മുപ്പെട്ട് തിങ്കൾ പൗർണമി

മുപ്പെട്ട് തിങ്കൾ പൗർണമി



ഉമാമഹേശ്വരന് പ്രാധാന്യമുള്ള തിങ്കളാഴ്ച പൗർണമി വരുന്നു

അഭീഷ്ടസിദ്ധികള്‍ക്കായി അനുഷ്ഠിക്കുന്ന വ്രതമാണിത്.

ദേവീ പ്രീതിക്ക് ഏറ്റവും പ്രധാനപ്പെട്ട ദിനമാണ് എല്ലാമാസത്തിലെയും പൗർണമി നാൾ . ഈ വർഷത്തെ മിഥുനമാസത്തിലെ പൗർണമിക്ക് ഒട്ടേറെ സവിശേഷതകൾ ഉണ്ട്.


1 . ഉമാമഹേശ്വരന് പ്രാധാന്യമുള്ള  തിങ്കളാഴ്ച പൗർണമി വരുന്നു.

2 . മിഥുനമാസത്തിലെ ആദ്യത്തെ തിങ്കളാഴ്ചയായതിനാൽ (മുപ്പെട്ട് തിങ്കൾ ) അതിവിശേഷം

3 . മിഥുനമാസത്തിലെ പൗർണമി  വ്രതം സന്താനഭാഗ്യത്തിന് ഉത്തമമാണ്.

4 . ഈ വ്രതം വടസാവിത്രി വ്രതം എന്നും അറിയപ്പെടുന്നു.


പശ്ചിമ ഇന്ത്യയിൽ ജ്യേഷ്ഠമാസത്തിലെ  പൗർണമി നാളിൽ സ്ത്രീകൾ അനുഷ്ഠിക്കുന്ന വ്രതമാണ് വടസാവിത്രി വ്രതം.വടവൃക്ഷം എന്നാൽ ആൽമരം.  ആല്‍മരവുമായി ബന്ധപ്പെട്ട് അനുഷ്ഠിക്കുന്ന വ്രതമായതിനാലാണ് ഈ പേര് വന്നത്.  ദാമ്പത്യ ക്ലേശം നീങ്ങാനും ഭർതൃസൗഖ്യത്തിനും ദീർഘസുമംഗലീ ഭാഗ്യത്തിനും അനുഷ്ഠിക്കുന്ന കാമ്യവ്രതമാണിത്.വ്രതങ്ങൾ അവയുടെ ഉദ്ദേശങ്ങൾക്കനുസൃതമായി  നിത്യവ്രതം, നൈമിത്തികവ്രതം ,കാമ്യവ്രതം എന്നിങ്ങനെ മൂന്നായി  തിരിച്ചിരിക്കുന്നു . കാമ്യവ്രതം എന്നാൽ പ്രത്യേക അഭീഷ്ടസിദ്ധികള്‍ക്കായി അനുഷ്ഠിക്കുന്ന വ്രതം എന്നാണ് അർഥം . ഈ വർഷം  ജൂൺ 16, 17 (മിഥുനം 1, 2)  തീയതികളിലാണ് പൗർണമി വരുന്നത്.

ഇത് വടസാവിത്രി പൂര്‍ണിമ അല്ലെങ്കില്‍ വടപൂര്‍ണിമ എന്നറിയപ്പെടുന്നു . വിവാഹിതരായ സ്ത്രീകള്‍ മാത്രം ആചരിക്കുന്ന വ്രതം എന്ന പ്രത്യേകതയും ഇതിനുണ്ട് .  വിവാഹിതരായ സ്ത്രീകള്‍ പൗർണമി ദിനത്തിൽ സൂര്യോദയത്തിനുമുന്നെ കുളിച്ചു കുറിതൊട്ട് നിലവിളക്ക് കൊളുത്തി ഇഷ്ടദൈവത്തെ പ്രാർഥിക്കുക .സമീപത്തുള്ളതോ ക്ഷേത്രത്തിലെയോ ആല്‍മരത്തിനു ചുവട്ടിൽ തൊഴുതു പ്രാര്‍ഥിച്ച ശേഷം  അരയാല്‍മരത്തിനു ചുറ്റും പ്രദക്ഷിണം വയ്ക്കണം .ചിലയിടങ്ങളിൽ ആല്‍മരത്തിനു ഏഴ് പ്രദക്ഷിണം വയ്ക്കുന്നതിനോടൊപ്പം മരത്തെ നൂലുകൊണ്ട് ചുറ്റാറുണ്ട് .വിവാഹിതരായ സ്ത്രീകള്‍ ആല്‍മരത്തില്‍ നൂല്‍കൊണ്ടുബന്ധിച്ച് അര്‍ച്ചന നടത്തി പ്രാർഥിച്ചാൽ ദീര്‍ഘസുമംഗലികളായിരിക്കുമെന്നാണ്  വിശ്വാസം.


പതിയുടെ ആയുസ്സിനു വേണ്ടി  ഉപവാസത്തോടെ വ്രതം അനുഷ്ഠിക്കുന്നവരുമുണ്ട്. ആരോഗ്യസ്ഥിതിയനുസരിച്ചു ഒരിക്കലോടെ വ്രതം അനുഷ്ഠിക്കാവുന്നതാണ്.അന്നേദിവസം കഴിവതും ഈശ്വരചിന്തയോടെ കഴിച്ചുകൂട്ടുക.ഫലമൂലാദികൾ മാത്രം കഴിച്ചും വ്രതം അനുഷ്ഠിക്കാവുന്നതാണ്.

ആൽമരത്തിന് പ്രദക്ഷിണം വയ്ക്കുമ്പോൾ ജപിക്കേണ്ട മന്ത്രം


മൂലതോ ബ്രഹ്മ രൂപായ മദ്ധ്യതോ വിഷ്ണുരൂപിണേ
അഗ്രത :ശിവരൂപായ വൃക്ഷ രാജായ തേ നമ :


ദീർഘ മംഗല്യത്തിനുള്ള മന്ത്രം

ലളിതേ സുഭഗേ ദേവി
സുഖസൗഭാഗ്യദായിനി
അനന്തം ദേഹി സൗഭാഗ്യം
മഹ്യം തുഭ്യം നമോനമ: